काठमाण्डौ
मंसिर १०
नेकपा एमालेका अध्यक्ष केपी शर्मा ओलीले नेकपा माओवादी केन्द्रका अध्यक्ष पुष्पकमल दाहाल नेतृत्वको सरकारलाई चटकेको संज्ञा दिनुभएको छ ।
संविधान कार्यान्वयनका लागि बनेको सरकारले संशोधनको कुरा गर्नुलाई उहाँले चटकेको संज्ञा दिनुभएको हो । प्रेस चौतारी कास्कीले पोखरामा आयोजना गरेको पत्रकार सम्मेलनमा ओलीले सरकारले निर्वाचनतिर कुनै ध्यान नदिएको आरोप लगाउनुभयो । सरकारले संविधान संशोधन विधेयक दर्ता गर्ने भए पनि त्यसलाई आफूहरुले रोक्न नसक्ने पनि उहाँले बताउनुभयो । विसं २०७४ माघ ७ गतेसम्म चुनाव नभए राजनीतिक र संवैधानिक सङ्कट उत्पन्न हुने भए पनि त्यसतर्फ सरकारको कुनै तयारी नभएको उहाँको भनाइ छ । जनतालाई आवश्यक नपर्ने संविधान संशोधन आफूहरूलाई मान्य नहुने बताउँदै उहाँले देश तथा जनताका हकअधिकारका सम्बन्धमा मात्र संविधान संशोधन हुनसक्ने बताउनुभयो । कुनै नयाँ आयोजना वा भइरहेका आयोजनामा बजेट नपुग भए मात्र पुरक बजेट ल्याउन सकिने भएपनि सरकारले त्यस्तो अवस्था पुष्टि गर्न नसकी पुरक बजेट ल्याउन खोजेको उहाँले आरोप लगाउनुभयो ।
