काठमाण्डौंको न्यूरोडमा बिस्तार गर्न लागिएको फुटपाथको समाचार संकलनमा पुगेका हरेकन्युज डटकमका सम्पादक सहित अन्य पत्रकारमाथि भएको हातपातको घट्नामा सञ्चार सम्बद्ध संस्थाहरुले खेद प्रकट गरेका छन् । गत बुधबार स्थानीयले पत्रकारमाथि एकपक्षीय समाचार लेखेको आरोप लगाउदै हातपात गरेपछि यसको विरोध भएको हो ।
घट्नामा हरेकन्युजका कृष्ण कट्टेल र नवराज पहाडी,पाथिभरा च्यानलका सुदिप भण्डारी र राईटसञ्चारका पुस्कर भण्डारीमाथि हातपात र गालीगलौज भएको थियो । घट्नाको बिरोध गर्दै नेपाल पत्रकार महासंघ,प्रतिष्ठान प्रदेश समितिले विज्ञप्ती जारी गरेको छ । ‘उहाँहरुलाई रिपोर्टिङ गर्न नदिई सो क्षेत्रबाट निकालिएकोमा प्रदेश समिति भोर भत्सर्ना गर्दछ’ सचिव नरेन्द्र मानन्धरले जारी गरेको विज्ञप्तीमा उल्लेख छ । सोहि घट्नाको श्रमजीवि पत्रकार संघ,नेपालले समेत विज्ञप्ती जारी गर्दै प्रेस तथा अभिव्यक्ति स्वतन्त्रताको सम्मान गर्न सम्बन्धित निकायको ध्यानाकर्षण गराएको छ । प्रशारित समाचारमा चित्त नबुझे प्रेस काउन्सिलमा उजुरी गर्न पाउने अधिकार हुँदाहुँदै केहि व्यक्तिले हातपात र गालीगलौजमा उत्रिनु निन्दनीय भएको अध्यक्ष जन्मदेव जैसीद्धारा जारी विज्ञप्तीमा भनिएको छ ।
घट्नामा संलग्नले आफूहरुबाट गलत भएको स्विकारेका छन् । हातपात र गालीगलौज भएपछि प्रहरीमा जाहेरी दिन पुगेका पत्रकारलाई काठमाण्डौं महानगरपालिका २२ वडाका अध्यक्ष चिनीकाजी महर्जनको समन्वयमा घट्ना घटाउने व्यक्तिले आफूहरुबाट भएको कमीकमजोरीलाई महसुस गरेका छन् । सो क्रममा वडा अध्यक्ष महर्जनले छलफल र सहमतीबिना काठमाण्डौं महानगरपालिका पेलेर काम गर्न आएकाले तीन दिनदेखि नसुती स्थानीयले सडक खन्न नदिएको बताए । ‘वास्तवमै न्यूरोडको २२ नम्बर वडाबासी पीडामा छौँ । महानगरपालिका जुनसुकै बेला आएर डोजर चलाउनसक्ने भएकाले स्थानीय चनाखो छन्,हैरान भएका छन् । भिडभाडमा त्यस्तो हुन गएकाले अन्यथा नलिनुहोला’ अध्यक्ष महर्जनले भने । न्यूरोडमा बिस्तार गर्न लागिएको फुटपाथको बिषयमा बिहिबार बसेको महानगरपालिकाको कार्यपालिका बैठकमा उनै वडा अध्यक्ष महर्जनले प्रमुख बालेन्द्र शाहसँग केहिबेर सवाल जवाफ गरेका थिए । स्थानीयको असहमतिपछि हाल महानगरपालिकाले न्यूरोड क्षेत्रमा फुटपाथ बिस्तारको काम तत्काललाई रोकेको छ ।
