काठमाडौँ, १३ पुस ।
नेकपा एमालेलगायतका प्रतिपक्ष दलहरुले व्यवस्थापिका–संसद्को बुधबारको बैठक पनि अबरुद्ध गरेका छन् । सरकारले गएको मङ्सिर १४ गते संविधान संशोधनको लागि संसद् सचिवालयमा प्रस्ताव दर्ता गराएसँगै प्रमुख प्रतिपक्ष एमालेलगायतका दलले संसद्को बैठक निरन्तररुपमा अवरोध गर्दै आएका छन् ।
संविधान संशोधनको प्रस्ताव फिर्ता लिएर निर्वाचनको वातावरण नबनाएसम्म अवरोध जारी राख्ने प्रतिपक्षको अडान छ । यता सभामुख ओनसरी घर्तीले निरन्तरको संसद्को अवरोध हटाउन तथा दलहरुबीच देखिएको तिक्तता र अविश्वासलाई अन्त्य गरी सहमति जुटाउन प्रयास गरिरहनुभएको छ ।
मधेस केन्द्रित दलको मागलाई सम्बोधन गर्न संविधान संशोधन प्रस्तावलाई अघि बढाउन सत्तारुढ नेपाली काँग्रेस र नेकपा माओवादी केन्द्रले गरेको आग्रहलाई प्रमुख प्रतिपक्ष दल नेकपा एमालेले अस्वीकार गर्दै आएको छ । संसद्को अर्काे बैठक बिहीबार (भोलि) दिनको १ बजे बोलाईएको छ ।