काठमाण्डौ
असोज १७
त्रिवि शिक्षण अस्पतालमा आठ दिनदेखि आमरण अनसनमा बस्नुभएका वरिष्ठ चिकित्सक गोविन्द केसीको समर्थनमा शिक्षण अस्पताल महाराजगञ्जका सबै आवासीय चिकित्सक तथा विद्यार्थीलहरुले आन्दोलन थालेका छन् । रेजिडेन्ट डाक्टर एसोसिएसनका अध्यक्ष लिजन महर्जन र सचिव सतिस शर्माले आज एक विज्ञप्ती जारी गर्दै भोलीबाट ओटी र इमरजेन्सी सेवाबाहेकका अन्य कुनैपनि शैक्षिक क्रियाकलापमा सहभागी नहुने बताएका छन् ।
साथै उनिहरुले आफ्नो सम्पूर्ण शैक्षिक कार्यक्रममा सहभागी नहुने पनि जानकारी गराएका छन् । चिकित्सा शिक्षा ऐन संसद्बाट पारित हुनुपर्ने, अख्तियार दुरुपयोग अनुसन्धान आयोगका प्रमुख आयुक्त, आयुक्तलाई महाअभियोग लगाउनुपर्ने र यसअघि सरकारले आफुसँग गरेका सहमतिमध्ये कार्यान्वयन हुन बाँकी रहेका बुँदाहरु तत्काल कार्यान्वयन गर्नुपर्ने माग राख्दै उहाँले पुनः अनसन सुरु गर्नुभएको हो । सरकारले मेडिकल कलेजलाई सम्बन्धन नदिने, उपत्यकाबाहिर मेडिकल कलेज स्थापना गर्नेलगायतका केही माग पूरा गरेको छ भने चिकित्सा शास्त्र अध्ययन संस्थान(आइओएम) मा बरिष्ठताका आधारमा डिन नियुक्त गर्नेलगायतका केही सहमति कार्यान्वयन हुन बाँकी छ । यसैविच एक हप्तादेखि अनसन बसिरहनुभएका डा. केसीको स्वास्थ्य अवस्था थप जटिल बन्दै गएको उहाँको उपचारमा संलग्न चिकित्सकले बताएका छन् । केसीको मुटुको चालमा घटबढ भईरहेको, मसलहरु कमजोर बन्दै गएको, छाती दुखेर रिङगटा लाग्ने, बोल्न गार्हो हुने, टाउको दुख्ने समस्या देखा परेको उहाँको उपचारमा संलग्न प्रमुख डाक्टर दिव्यासिंह शाहले जानकारी दिनुभयो ।
